انا تزوجت شهر شعبان
مضت 4 شهور وماحملت رحت مستشفى الروضه
بتاكد ماعندي مشاكل بالرحم لاسمح الله
سوت لي فحوصات وتحاليل وقالت لي مرتفع هرمون الحليب
ووصفت لي حبوب وقالت لي بسوي لك متابعة تبويض كل اسبوع
شهر كامل وانا رايحه جايه عليها واشعات
وخرابيط يوم صار حجم البويضه مناسب
عطتني ابرة تفجير مدري وشو وبعد كل هذا ماحملت
قلت لامي قالت لي وش هالخرابيط توش 4 شهور
والمستشفيات الخاصه يبغو فلوس وبس روحي الجش احسن
اخدت تحويله ورحت الجش وكان لي 6 شهور من زواجي
شافت نتيجة الهرمون قالت لي مو مرتفع الارتفاع اللي يمنع الحمل
وانتي توك متزوجه كيف تعطيك علاجات وهزأتني
قالت لي تعالي بعد شهرين اذا ماحملتي نشوف لك حل
رجعت البيت وقلت بخليها على الله
بعدها بشهر سوو سفرة ام البنين وجابو راية العباس
قالت لي عمتي ام رجلي حطيها عليش واقري آية الكرسي
ويوم ثاني رحت لخالتي عطتني ماي من تحت ضريح العباس
واطلبي من ام البنين تحملي وكنت بنفس اليوم مغتسله ورايحه
بعدها بثلاث اسابيع صار جسمي طول الوقت حار وبغى انام
وزوجي يقول قومي نطلع قلت له حامل وصدق واستانس قام يتخيل اني حامل
قبل الدوره بثلاث ايام قلت لصديقتي انا حامل هالشهر ترى
قالت لي سويتي تحليل قلت لا بس انا الشهر اللي طاق سويت كذا كذا
فخلاص ليش تبغيني مااتاكد قالت اذا حللتي فرحيني
يوم الدوره جاب لي رجلي اختبار حمل سويته الليل
طلع خط واحد وصابتني خيبة امل قام رجلي غسل اسنانه يبغى ينام
انا على الكنبه انفجرررت صيااااح قال لي قومي غناتي نامي وبكره باجيب واحد
يمكن لازم وانتي صاحيه من النوم
قلت باغسل اسناني وباجي انام وانا اغسل اسناني مسكت اقول مو معقوله
اخر امل لي كان ام البنين سلام الله عليها انا وش اسوي اللحين
ماطالعت الجهاز الا فيه خطيــــــــــــــــــــــــــــن
رحت الغرفه وتنط نطت على السرير واقول خطيييييين خطيين
مانام رجلي هذيك الليله وصحاني الصبح رحنا المدلوح قالت الفلبينيه الف مبروك
قالت لها عيدي وش قلتي قالت الف مبروك سحبني من ايدي ورحنا نفطر
بالطريق كلم امه وقال لها ببشرك مرتي حامل
الاسبوع اللي بعده طلعت له وظيفه حكوميه اتصل لامه قال لها بشاره
قالت له بعد بشارة الاسبوع اللي راح مافي بشاره اكبر خخخخخ
قدمها خير بتي الجميله
كتبت قصة حياتي